‘Gurean’, animaliak erabiltzen dituzten festei buruzko dokumentala aurkeztuko du Askekintzak

‘Gurean’ dokumentala ezagutzera eramateko trailer bat prestatu du donostialdeko Askekintza talde antiespezistak. Martxoaren 23an Trueba aretoan estreinatuko da Euskal Herriko festetan egiten den animalien erabileraren inguruko lehenengo dokumentala.
Lau urteetako ikerketaren ondorioa, Askekintzako hainbat aktibistek ezkutuan grabatutako irudiekin osatu den proiektua da ‘Gurean’. Dokumentala euskaraz dago grabatua, eta frantsesezko, gaztelaniazko eta ingelesezko azpidatziak izango ditu. Donostiako Trueba zineman ikusi ahal izango da datorren martxoaren 23an eta sarrera librea da. Irudiek ikusleen sentsibilitatea min dezakete.