Gizateria babestea da Gurutze Gorriaren agindu nagusietako bat, eta hori lortzeko boluntarioen parte-hartze aktiboa funtsezkoa da. Horregatik, Boluntariotzaren Nazioarteko Eguna dela-eta, Gurutze Gorria Euskadik eskerrak eman nahi dizkie Araban, Bizkaian eta Gipuzkoan laguntza behar dutenengana iristea posible egiten duten 12.169 boluntarioei. Haien konpromisoa ezinbestekoa da mugimendu humanitarioaren barruan; Estatu osoan, 231.000 boluntario baino gehiago daude.
2024an, Gurutze Gorriak 45.000 pertsona baino gehiago artatu zituen autonomia mailan, 2,8 milioi estatu mailan eta 7,3 milioi nazioartean. Lan handi hori guztia boluntariotzaren indarrari esker egin da, larrialdi handietan mobilizatzen baita —DANAren ondoren gertatu zen bezala—, baina baita eguneroko egoera zaurgarrien aurrean ere: nahi ez den bakardadea pairatzen duten pertsonak, lana bilatzen ari direnak edo baliabiderik ez dutenak, beste askoren artean.
«Boluntariotza da gure indarra, bultzatzen gaituena eta gehien behar gaituzten pertsonengandik gertu egoteko aukera ematen diguna. Boluntario bakoitzak gehien motibatzen dion horretan lagundu ahal izatea nahi dugu; horretarako, jarduera espezializatuagoak eta profil bakoitzera egokituak eskaintzen ditugu, haien gaitasun, interes eta eskuragarritasunaren arabera, esperientzia aberasgarria eta esanguratsua bizi dezaten», adierazi du Fernando Richter Iturreguik, Euskadiko boluntariotzaren arduradunak.
Euskadiko boluntariotzak aniztasun belaunaldizkoa islatzen du: lau pertsonatik batek 29 urte baino gutxiago ditu, eta batez besteko adina 42 urtekoa da. Emakumea, 30 eta 50 urte bitartekoa, da boluntariotzaren profilik nagusiena Euskadin; emakumeak %54,3 dira, eta 30 eta 49 urte bitarteko adin-tarteek boluntario guztien %40 baino gehiago biltzen dute. Talderik handiena 40-49 urte bitartekoa da (%21), ondoren 30-39 (%20) eta 50-59 (%18).
Konpromiso hau lurralde osoan islatzen da:
- Bizkaia: 7.828 boluntario
- Gipuzkoa: 2.589 boluntario
- Araba: 1.752 boluntario
Gipuzkoako boluntariotza
Gipuzkoan, 2.589 pertsona dira boluntariotzaren parte, eta horietatik 174 aurten batu dira. Batez besteko adina 40 urte da; %55,31 emakumeak dira eta %44,69 gizonak. Guztira, 34.000 ordu baino gehiago eskaini dituzte jarduera solidarioetan 2025ean. Ahalegin gehiena egoera ahulean dauden pertsonei laguntzera bideratzen da, eta ondoren adinekoei eta haurrei arreta ematera.
Deja un comentario