Miguel Martín Jazzaldiako zuzendariak aitortu duenez, “pozez zoratzen” daude aurtengo edizioarekin,non ordainpeko eta doako kontzertuek 171.500 pertsona bildu dituzten. 153.000 izan dira doako emanaldietan eta 18.500 ordainpekotan. Aurtengoan izarrak lerrokatu dira eta itzelezko artista mordoa izan dituzte, horien artean Iñaki Salvador; Mary Stallings; Brad Mehldau; Holland, Hussain eta Potter hirukotea; Michel Portal… Horrexegatik, zaila da bakar batzuk nabamentzea. Azken urteetako ediziorik borobilenetakoa izan da musikari dagokionean eta entzuleriak gogotsu erantzun du, beste behin ere.
Agertoki Berdean jai giroa nagusitu zen eta jendetza bildu zen. Miguel Martinek zenbait kontzertu azpimarratu ditu, besteak beste Rubén Blades panamarrarena, Gary Clark Jr.-ek argi utzi zuen bluesa duela zainetan, Mikel Erentxun, Morgan…
Jaialdi borobila izan da, aho-zapore gozoa uzten duenetakoa, eta Martinek esan du ez dela “kontzertu txarrik egon”. Hurrengo edizioaren datak jarrita daude jada: 2019ko uztailaren 24tik 28ra izango da.
