Errausketaren Aurkako Mugimenduak elkarretaratzea deitu du datorren igandean, irailaren 13an, 11.00etan, Kontxako hondartzan, Zubietako erraustegia gelditzea eskatzeko. Protesta Donostiako estropaden egun handiarekin bat eginez egingo dute, Ez erre etorkizuna. Erraustegia gelditu lelopean.
Deitzaileek Gipuzkoako herritarrei parte hartzeko deia egin diete eta hondakinen errausketak osasunean, ingurumenean eta kliman dituen ondorioak salatu dituzte. Haien arabera, Zubietako erraustegia «Gipuzkoan negutegi eragina daukaten gas gehien isurtzen duen instalazioetako bat» da.
Mugimenduak azken urtean erraustegiko langileek egindako mobilizazioak ere aipatu ditu. Oharrean dioenez, aurten hamar lanuzte eta borroka egun egin dituzte langileen osasuna bermatzea eta barne araudia aldatzea eskatzeko. Era berean, duela egun gutxi izandako sutea aipatu dute, eta langileek hura itzaltzeko orduan izandako baldintzak salatu dituzte.
Errausketaren Aurkako Mugimenduak Gipuzkoako Foru Aldundiari eta udalei erraustegia gelditzeko eskatu die, eta hondakinen kudeaketan berrerabilpena, birziklapena eta konpostatzea lehenesteko aldarrikatu du.
Deialdiak LAB, ELA, CCOO eta ESK sindikatuen eta Bildu, Elkarrekin, Berdeak Equo, Eguzki, Ekologistak Martxan eta Donostia Bizirik taldeen atxikimendua du.
Deja un comentario