Maiatzaren 6an, entzumen-osasunari buruzko jardunaldia egingo da Easo plazan, herritarrak entzumen-azterketen garrantziaz eta entzumen-galeraren detekzio goiztiarraz sentsibilizatzeko.
Audika Entzumen-zentroen ekimena da, Udalarekin lankidetzan. Bertan, nahi duten donostiar guztiek doako entzumen-proba bat egiteko aukera izango dute horretarako prestatutako puntuan, 9: 30etik 14:30era.
«Proba honen bidez, herritarrek beren entzumen-maila ezagutu ahal izango dute, eta entzumen-galera egon daitekeela erakusten duten seinale eta sintomei buruzko informazioa jasoko dute», azaldu du Osasun Publikoko zinegotzi Iñigo Garciak. Gainera, parte-hartzaile bakoitzari hainbat opari emango zaizkio. Donostiako Udalak donostiar guztiei, gazteei zein adinekoei, Easo plazan doako entzumen-proba bat egiteko deia egin die.
OMEren arabera, munduan 1.500 milioi pertsonak baino gehiagok dute entzumen-galeraren bat. Entzumen-galera garaiz detektatzen ez bada, arazo sozialak (isolamendua, komunikazio-falta…), fisikoak (nekea, estresa, zorabioak…), psikologikoak (depresioa, suminkortasuna, mesfidantza…) eta kognitiboak (dementzia, alzheimerra…) eragin ditzake. Horregatik, oso garrantzitsua da entzumena urtean behin berrikustea.
Audikaren entzumen-arloko adituak bertan egongo dira entzumen-galera posible bati lotutako arriskuei buruzko informazioa emateko. Zure entzumena zaintzea zure osasuna zaintzea da.
Ekimenari buruzko informazio gehiago nahi izanez gero, deitu 900 31 40 33 doako telefonora edo idatzi [email protected] helbidera.
Deja un comentario