Gipuzkoako Foru Aldundiko Jasangarritasun Departamentuak eta Andade elkarteak urtebete baino gehiago daramate elkarlanean, material sozio-sanitarioaren berrerabilera sustatzeko helburu bikoitzarekin: hondakinak murriztea eta testuinguru zaurgarrietako proiektu sozialak laguntzea.
Lankidetza horren emaitza gisa, gurpil-aulkiak, ohatilak, ordenagailuak eta haur ekipamendua jasotzen dituen lote bat bildu da, eta Mirando por África GKEak Doualan (Kamerun) kudeatzen duen Lamina hezkuntza bereziko eskolari emango zaio.
Jasangarritasun Departamentuaren mendeko Gipuzkoako Klima Aldaketaren Fundazioak – Naturklima-k bilketa horretarako zaintza eta biltegiratze gunea utzi du. Ekintza honek agerian uzten du Gipuzkoaren konpromisoa klima-ikuspegitik eta ikuspegi zirkularretik nazioarteko lankidetzarekin.
Lan hau Kultura eta Lankidetza Departamentuarekin koordinatuta gauzatu da, eta Ayuda Contenedores eta Andade GKEek egingo dute bidalketaren kudeaketa.
Jasangarritasun diputatu José Ignacio Asensiok azpimarratu du ekimen hau ekonomia zirkularraren printzipioak maila globalean aplikatzeko modu zehatza dela. “Material sozio-sanitarioaren berrerabilpena bultzatzen ari gara, hondakinak murrizteko eta, aldi berean, komunitate zaurgarrietan eragin positiboa sortzeko tresna gisa. Lankidetza mota honek erakusten du jasangarritasuna eta elkartasuna eskutik joan daitezkeela”.
Asensiok gehitu du ildo horri eutsi nahi diotela: “Andade bezalako erakundeekin lanean jarraituko dugu praktika hori sendotzeko. Helburu sozialetarako berrerabiltzeak erakusten du lankidetzarako modu bidezkoagoa eta eraldatzaileagoa posible dela”.
Bidaltzen den materiala
Naturklimak bildu eta biltegiratu duen ekipamendua honako hau da:
- 12 gurpil-aulki (helduentzako)
- 4 zoru-koltxoneta
- 2 kontsulta-ohatila
- 4 ordenagailu
- 2 inprimagailu
- 4 bidaia-sehaska
- 2 sehaska arrunt
- 4 haur-orgatxo
- 2 kutxa nitrilozko eskularru
- 1 txirrista
- 1 pilota-kaxa
- 1 eskuzko nekazaritza-erreminten kit (ezkurra)
Ekipamendu hori Lamina eskolara bideratuko da, Alima Ngoume aktibista kamerundarrak sortutako hezkuntza zentro inklusibora. Alima Mirando por África elkartearen sortzailea ere bada, emakume migratuek gidatutako GKE bat, eta 2016tik ari dira lanean Doualan, desgaitasuna duten haurrak laguntzen gizarte-bazterkeriaren, estigmen eta zerbitzu espezializatuen faltaren aurrean.
Goizane Álvarez, Kultura eta Lankidetza diputatuaren hitzetan: “Lankidetza honek Gipuzkoak pertsonetan oinarritutako nazioarteko lankidetzarekin duen konpromisoa islatzen du. Erakunde eta herritarren arteko elkarlanari esker urrunago iritsi gaitezke. Gipuzkoatik elkartasunezko eta duintasuneko zubiak eraikitzen jarraitu nahi dugu, bereziki memoria migratzailean eta Alima bezalako emakumeen lidergoan oinarritutako ekimenen bidez”.
Eskola integratzaile baten sorrera
Proiektuaren jatorria Lamina izeneko haurraren inguruan dago, Alimaren alaba, minusbaliotasun batekin jaioa. Bere komunitatera itzultzean, bazterkeria soziala eta estigma pairatu zituen. Egoera horren aurrean, Alimak eskola inklusibo bat sortzea erabaki zuen, desgaitasuna duten haurrei eta haien zaintzaileei arreta medikoa, prestakuntza eta elikadura eskaintzeko.
Kalkuluen arabera, Kamerunen 800.000 pertsonak baino gehiagok dute desgaitasun intelektualen bat. Gipuzkoatik bidalitako lankidetza hau giza eskubideetan, justizia sozialean eta ekonomia zirkularrean oinarritzen da, eta eraldaketarako tresna gisa ulertzen da.
Deja un comentario