Gipuzkoako Foru Aldundiak 42.250 euro bideratuko ditu 2026an ingurumen- eta gizarte-proiektuetara

Jasangarritasun Departamentuak 42.250 euroko dirulaguntza-lerroa aktibatuko du 2026rako, ingurumen- eta gizarte-proiektu berriak bultzatzeko. Helburua da ingurumen-hezkuntza indartzea, herritarren sentsibilizazioa eta parte-hartze soziala sustatzea, eta natura-ingurunearen kontserbazioa babestea, trantsizio ekologiko inklusibo eta parte-hartzailea sustatuz.

Dirulaguntzek honako Garapen Jasangarriko Helburu hauek (GJH) lagunduko dituzte: 3. Osasuna eta ongizatea; 6. Ur garbia eta saneamendua; 7. Energia eskuragarria eta ez-kutsagarria; 11. Hiri eta komunitate jasangarriak; 12. Ekoizpen eta kontsumo arduratsuak; 13. Klimaren aldeko ekintza; 14. Urpeko bizitza; eta 15. Lehorreko ekosistemen bizitza.

Jasangarritasuneko diputatu José Ignacio Asensiok adierazi duenez, “deialdi honen bidez, sendotu egiten dugu trantsizio ekologiko bidezkoaren aldeko konpromisoa, inor atzean utziko ez duena eta osasuna, ongizatea eta berdintasuna politika publikoen erdigunean kokatuko dituena”. Halaber, nabarmendu du proiektuak bultzatu nahi direla ingurumen-ezagutza herritarrengana hurbiltzeko, parte-hartze aktiboa sustatzeko eta eguneroko ohituretan benetako aldaketak eragiteko.

Lau jarduera-eremu

Deialdiak lau jarduera-eremu jasotzen ditu: ingurumenaren egoerari eta klima-aldaketaren eraginari buruzko azterlan eta ikerketak; herritarrei zuzendutako informazio- eta sentsibilizazio-ekintzak; ingurumen-boluntariotza sustatzeko proiektuak; eta herritarren zientziako ekimenak, ibilbide zientifiko aitortua duten erakunde edo pertsonek koordinatuak.

Laguntzak Gipuzkoako irabazi-asmorik gabeko elkarteei zuzenduta daude. Departamentuak nabarmendu du erakunde horiek funtsezko aliatuak direla herritarren parte-hartzea eta ingurumen-kontzientzia kolektiboa sustatzeko.

Deialdia Euskadiko Ingurumen Administrazioaren 10/2021 Legean eta Natura Ondarea Kontserbatzeari buruzko 9/2021 Legean oinarritzen da, eta 2024-2027 aldirako Dirulaguntzen Plan Estrategikoaren parte da. Genero-ikuspegia ere txertatzen du balorazio-irizpideetan.

Eskabideak aurkezteko epea 20 egun baliodunekoa izango da, deialdia Gipuzkoako Aldizkari Ofizialean argitaratu eta hurrengo egunetik aurrera.