Asteazkenean ‘Gipuzkoako historiaren pasarte ezezagunak’ zikloaren barruan, Foru Aldundiko Kultura Sailak eta Miguel de Aranburu Gipuzkoako Historialarien Elkarteak antolatuta, Malen Lizarraga Olanok hitzaldia emango du: ‘Gipuzkoar olagizonak eta burdinola jabeak Nafarroan Aro Berrian zehar’.
Goizane Álvarez Kultura diputatuak adierazi duenez, “ziklo honen helburua da Gipuzkoaren historiako pasarte ez hain ezagunak nabarmentzea, Antzinarotik XX. mendera arteko aldi historiko zabala hartuz”.
Asteazkeneko saioan azalduko da nola nafar burdinolek XIV. mendetik desagerpen garaira arte ezaugarri errepikakor bat izan zuten: gipuzkoarren presentzia nabarmena. Burdinolen jabetzan eta finantzaketan ez ezik, maizter, langile espezializatu, garraiolari eta beste hainbat ofiziotan ere parte hartu zuten. Jabetza gipuzkoarrak XVI. mendeko 80ko hamarkadara arte iraun zuen oro har, eta ondoren errentan eta merkataritza jardueretan jarraitu zuten.
Lotura hauskaitz horrek Nafarroa eta Gipuzkoaren arteko burdingintza harremana azaleratzen du.
Malen Lizarraga Olano (Leitza, Nafarroa) Historian graduatua da EHUn; Magisteritzako masterra egin zuen UPNn eta Arkeologiakoa, berriz, Granadako Unibertsitatean (UGR). Gaur egun bere doktoretza tesia depositatzeko prozesuan dago: ‘Nafarroako burdinolak eta burdingintza XVI. mendetik XVIII. mendearen erdialdera arte. Kantauri isurialdeko burdin ekoizpenaren bilakaera’.
Indusketetan eta hainbat argitalpenetan parte hartu du, besteak beste: ‘La presencia guipuzcoana en la siderometalurgia navarra durante la Edad Moderna’ (2023), ‘Nafarroako burdinaren komertzializazioa globalizazio goiztiarraren testuinguruan’ (2023) eta ‘Urdazubiko San Salbatore premontretar monasterioa: burdingintza gune Behe Erdi Arotik XIX. mende arte’ (2025).
Hitzaldia euskaraz izango da, 19:00etan, Santa Teresa komentuko areto nagusian, gaur egungo Koldo Mitxelena Kulturunearen egoitzan. Bertan izango da Beñat Eguiluz ere, nahiz eta bere eginkizuna zehaztu gabe dagoen.
Deja un comentario