Donostiako Aieteko Kultur Etxeak asteazken honetan, martxoaren 18an, inauguratuko du Ilustrazioaren Txokoa: Miguel Berzosa erakusketa, eta ekainaren 7ra arte egongo da zabalik.
Erakusketa honek Miguel Berzosa Martínez (Donostia, 1945) marrazkilari eta margolariaren ibilbide oparoa jasotzen du. Autodidakta izanik, txikitatik izan zuen komikiarekiko interesa, eta 70eko hamarkadan hasi zen profesionalki lanean Donostiako Erein argitaletxean. Garai hartan sortu zuen Mintxo pertsonaia ezaguna, Ipurbeltz aldizkarian argitaratua eta euskal komikigintzan arrasto sakona utzi duena.
Bere ibilbidean zehar, Berzosak hainbat arlotan egin du lan: biografiak, abenturazko komikiak, literatura-egokitzapenak eta ilustrazioa gazteentzako liburuetan, besteak beste. Iparragirreren eta Elkanoren bizitzak marraztu ditu, baita Amaia, vascos del siglo VIII lanaren moldaketa ere. Gainera, nazioarteko ibilbidea ere garatu du, Europan, Amerikan eta Asian argitaratuz.
Prentsan ere jardun izan du ilustratzaile gisa, besteak beste Diario Vasco eta El Correo egunkarietan. Halaber, komiki erlijiosoaren esparruan lan handia egin du, eta hainbat santuren biografiak sortu ditu, nazioartean zabalkunde handia izan dutenak.
Aieteko Kultur Etxeko Ilustrazioaren Txokoa 2012an sortu zenetik, euskal ilustratzaile klasiko zein garaikideen lanak hartu ditu, eta izen esanguratsu ugari igaro dira bertatik. Oraingoan, Berzosaren lana izango da protagonista, bere ibilbide luzea eta askotarikoa publikoari hurbiltzeko.
Erakusketaren ordutegia honakoa izango da: asteartetik ostiralera 16:00etatik 20:30era; larunbatetan 10:00etatik 14:00etara eta 16:30etik 20:00etara; eta igandeetan 10:00etatik 14:00etara. Astelehenetan eta jaiegunetan itxita egongo da, eta Aste Santuan goizez bisitatu ahal izango da egun jakin batzuetan.
Deja un comentario