Air Nostrum airelineak Donostiako aireportuan eskaintzen dituen asteroko sei hegaldi bertan behera utzi ditzake, eta Donostiako alkate Eneko Goiak horrek “kezkatzen” diola onartu du kazetarien aurrean. Bihar Ortzibia azpiegituraren sustatzailearen administrazio-kontseilua ospatuko da, eta horri buruz hitzegingo dute.

“Gaindiezinak diren muga fisikoak daudela badakigun arren, azpiegiturari etekinik hoberena ateratzeko gai izan beharko ginateke”, gaineratu du Goiak. Ortzibia “pizgarri gisa aritu da zenbait alorretan, hormigoizko pistaren tratamenduan adibidez”, jarraitu du alkateak. Bihar esandako administrazio-kontseiluan egongo da.

Bestalde, Goia “poz-pozik” egongo litzateke euskal erakundeak aireportuaren gestoreak izango balira, “baina ez da horrela, eta hori ez dago gure esku”. Beraz, kasu onetan agintaritza daukanari “eskatu” beharko diote.