Hamabost bat langile kalera joango lirateke eta erabiltzaileak lekuz aldatuko lituzkete, baina informazioa falta dela salatu du sindikatuak
Txara I-eko bizikidetza unitatea ixteak 16 pertsonen kaleratzea ekarriko luke, ELAren arabera, eta gaur goizean Intxaurrondon egindako elkarretaratzean, Aldundiaren “gardentasun falta” salatu du, “Erabateko babesgabetasuna eta informazio falta” izateaz gain. “Pandemiako zainketen alorrean langile horiek funtsezkoak direla saldu digute”, adierazi du Aimar Etxeberriak, sindikatuko Donostiako egoitzetako arduradunak.
Bizikidetza unitateen zerbitzuak hamar urte daramatza martxan, baina kontratua amaitzean amaitutzat emango da. Sindikatuaren arabera, Foru Aldundiak aurreikusita dauka dagoeneko hitzartuta dauden obrak egitea bertan.
Etxeberriak salatu duenez, enpresaren eta Aldundiaren arteko azken bileran “obrak 2022ko irailean egingo zirela esan zuten, eta kontratua ordura arte luza daitekeela pentsatzen dugu. Ez dugu bat-bateko erabaki hori ulertzen”.
