Aita Mari ontzia ostiral honetan abiatu da Santurtziko portutik Mediterraneo Erdialderantz, Itsas Salbamendu Humanitarioa (SMH) GKEaren 19. misioari ekiteko. Ontziak itsasoan arriskuan dauden pertsonak erreskatatzen eta giza eskubideen defentsan lanean jarraituko du, munduko migrazio-ibilbiderik arriskutsuenetako batean.
Misioa abiatu aurretik, Aita Mari bi hilabetez egon da Euskadiko hainbat portutan —Bilbo, Portugalete, Bermeo, Pasaia eta Santurtzin— mantentze-lanak, hobekuntza teknikoak eta tripulazioaren prestakuntza egiten. Aldi berean, herritarrei irekitako jardunaldiak antolatu ditu, tartean Donostian egin diren «Lekualdatze behartuak eta giza eskubideak» jardunaldiak.
SMHk azaldu du 19. misioa Mediterraneoko erreskate zibileko erakundeentzat gero eta zailagoa den testuinguruan hasten dela, Europako migrazio-politiken gogortzea eta ontzi humanitarioei ezarritako oztopoak direla eta. Elkartearen esanetan, nazioarteko itsas zuzenbideak arriskuan dauden pertsonak laguntzera eta portu seguru batera eramatera behartzen du, eta giza eskubideek lehentasuna izan behar dute migrazio-politiken gainetik.
Horregatik, herritarren babesa eskatu du berriro ere, Aita Mari ontziak Mediterraneoan bizitzak salbatzen eta giza eskubideen defentsan lanean jarraitu ahal izan dezan.
Deja un comentario