Aranzadi Zientzia Elkarteak Hegaztien eraztuntze zientifikoa Euskadin 2000-2024 aldian txostena aurkeztu du. Lanak erakusten du Aranzadiko Eraztuntze Bulegoak azken 25 urteetan izan duen bilakaera: eraztunle talde txiki baten jarduera koordinatzetik hegaztien ikerketa eta kontserbaziorako erreferentziazko azpiegitura zientifiko bihurtu da.
Hazkundea nabarmena izan da. 2000. urtean bost eraztunlek baino ez zuten osatzen bulegoa; 2024an, berriz, 76 eraztunle aktibo zituen Euskadin eta Estatu osoko 352 eraztunleri ematen zien zerbitzua. Gaur egun sare hori 450 eraztunletik gorakoa da.
Aztertutako aldian, Aranzadiren eraztunekin 203.000 hegazti baino gehiago eraztundu dira Euskadin. Horrez gain, 24.000 berreskuratze eta 32.000 marka bereziren irakurketa baino gehiago erregistratu dira; datu horiek funtsezkoak dira migrazioak, biziraupena, ugalketa eta klima- nahiz ingurumen-aldaketek hegaztietan duten eragina aztertzeko.
Juan Arizaga Aranzadiko Eraztuntze Bulegoko zuzendariaren esanetan, azken urteetan bulegoa «eraztunak kudeatzen dituen erakunde izatetik hegaztiei buruzko ezagutza sortzen duen azpiegitura zientifiko» izatera igaro da. Gaur egun ehunka mila erregistro kudeatzen ditu eta hainbat ikerketa-proiekturi laguntzen die.
Txostenak azpimarratzen du, halaber, kudeaketaren digitalizazioak eta tresna informatiko berrien garapenak datuen kalitatea hobetu dutela eta nazioarteko ikerketa-proiektuetan erabiltzea erraztu dutela. Era berean, Txingudi, Urdaibai, Salburua eta Zadorrako urtegiak Atlantiko ekialdeko migrazio-bidean funtsezko behaketa-gune direla gogorarazten du.
Azkenik, dokumentuak datozen urteetarako erronkak ere jasotzen ditu: espezie eta habitat jakinen jarraipena indartzea, eraztunleen sarea zabaltzea, tresna teknologiko berriak garatzea eta nazioarteko lankidetza sendotzea.
Deja un comentario