Donostia Zinemaldiak Turkiari eskainiko dio aurten ‘Focus on’ industria-ekimena. Industria Sailak antolatutako programaren bidez, herrialde, eskualde edo lurralde jakin bateko profesionalak Zinemaldira etortzen dira, harreman profesionalen sarea zabaltzeko eta Industriako jardueretan parte hartzeko.
2026ko edizioan, SEYAP Turkiako ikus-entzunezko ekoizleen elkartearekin lankidetzan, sektoreko hamar profesionalek parte hartuko dute. Helburua Europako eta Latinoamerikako beste herrialdeetako profesionalekin harremanak sustatzea eta koprodukziorako aukerak zabaltzea da.
Turkiako ordezkaritzan ekoizle hasiberriak zein esperientzia handikoak izango dira. Haien film luze eta dokumental proiektuak ekoizpenaren fase desberdinetan daude, garapenetik eta finantzaketatik postprodukziora.
Gainera, aurtengo Zinemaldian Turkiako bi ekoizpen hautatu dituzte. Yeşim Ustaoğluren Artakalan / What Remains Sail Ofizialean lehiatuko da, eta Tayfur Aidinen Kirpilerin Savaşı / The Battle of Hedgehogs, postprodukzio-fasean dagoena, WIP Europan izango da.
‘Focus on’ 2014an sortu zen, Kanadari eskainitako programarekin. Ondorengo edizioetan, besteak beste, herrialde nordikoak, Baltikoko herrialdeak, Polonia, Georgia, Serbia, Brasil eta Filipinak izan ditu ardatz.
Deja un comentario