Donostiak adimen artifizialari buruzko nazioarteko lehiaketa abiatu du unibertsitateko ikasleentzat

Donostiak Donostia Meeting Minds izeneko nazioarteko lehiaketa jarri du martxan, unibertsitateko gazteen artean adimen artifizialaren erabilera berritzailea sustatzeko. Ekimenaren lehen edizioa Donostia Sustapenak, Tecnunek eta El Diario Vascok bultzatu dute, Multiverse Computing enpresaren lankidetzarekin.

Lehiaketa edozein diziplina eta herrialdetako graduko, masterreko eta doktoregoko ikasleei zuzenduta dago. Parte-hartzea doakoa izango da, eta taldeak bi eta lau lagun artekoak izango dira.

Aurkezpenean parte hartu dute Ane Oyarbide Ekonomia eta Tokiko Enplegu zinegotziak, Iñigo Olaizola Donostia Sustapeneko zuzendariak, Francis Planes Tecnuneko zuzendariak eta Román Orus Multiverse Computing enpresaren sortzaile eta zuzendari zientifikoak.

Bi kategoria

Lehiaketak bi kategoria izango ditu. Lehenengoa, Hiri kategoria, Donostiako gizarte-erronkei lotutako proposamenentzat izango da, hala nola osasuna, ingurumena, inklusioa edo hezkuntza.

Bigarrena, Enpresa kategoria, adimen artifiziala enpresaren, ekintzailetzaren eta ikerketaren esparruan aplikatzeko proiektuei zuzenduta egongo da, besteak beste logistikan, finantzetan edo energian.

Epeak eta sariak

Proposamenak maiatzaren 15etik urriaren 11ra aurkeztu ahal izango dira, PDF formatuan eta azalpen-bideo batekin batera. Lanak [email protected] helbidera bidali beharko dira.

Urriaren 13an eta 14an aukeratuko dira finalistak, eta finala azaroaren 2an egingo da Donostian.

Kategoria bakoitzeko talde irabazleek Bostonera bidaia jasoko dute sari gisa, zientziaren, teknologiaren eta berrikuntzaren arloko erakundeak ezagutzeko.

Lehiaketari buruzko informazio guztia www.donostiameetingminds.com webgunean dago.