Donostiako Udalak irisgarritasuna hobetzeko bi esku-hartze egin ditu Larratxon eta Antiguan, guztira 116.037 euroko inbertsioarekin. Hiri Mantentze eta Zerbitzuetako Departamentuak sustatutako lanen helburua arkitektura-oztopoak kentzea, zoladurak berritzea eta oinezkoen segurtasuna eta erosotasuna hobetzea da, batez ere adinekoentzat, mugikortasun murriztua duten pertsonentzat eta haur-orgak erabiltzen dituzten familientzat.
Hiri Mantentze eta Zerbitzuetako zinegotzi Iñigo Garcíak adierazi duenez, «lanean jarraitzen dugu Donostiako irisgarritasun-sarea handitzeko eta hobekuntzak pixkanaka hiriko auzo guztietara irits daitezen lortzeko». «Batzuen ustez, esku-hartze horiek txikiak dira, baina eragin zuzena dute pertsona askoren eguneroko bizitzan. Desnibel bat kentzeak, espaloi bat zabaltzeak edo oinezkoen pasabide bat hobetzeak aukera ematen dute gure auzoak seguruagoak, erosoagoak eta irisgarriagoak izateko», gaineratu du.
Larratxo pasealekuko 26. zenbakiaren ingurua
Lehenengo jarduera Larratxo pasealekuko 26. zenbakiaren atzealdean egin da eta, Udalak azaldu duenez, inguruko bizilagunek egindako eskaerei erantzuten die. Esku-hartzeak Larratxoko adinekoen zentrorako eta Ostadar Larratxoko Emakumearen Zentro Soziokulturalerako sarbideak hobetuko ditu.
Espaloietako eta aparkaleku-guneetako zoladurak berritu dira eta egungo hirigintza-oztopoak kentzeko lanak egin dira. Horretarako, baldosa eta aglomeratuzko zoladura altxatu eta eraitsi da, dauden harrizko zintarriak kendu eta berreskuratu dira eta espaloiaren eta galtzadaren oinarriak berritu dira. Ondoren, berreskuratutako zintarriak berriro jarri dira, hormigoizko areka berri bat eraiki da eta zoladura berria jartzeko beharrezkoak diren zagor eta hormigoi geruzak zabaldu dira. Jarduera amaitzeko, seinale horizontalak berritu dira. Lanek 95.603 euroko aurrekontua izan dute.
«Obra honen bidez, auzo-eskaera bati erantzuten diogu, eta auzoan asko erabiltzen diren bi gizarte-ekipamenduren irisgarritasuna hobetzen dugu. Gure helburua da edozein pertsonak aukera izatea autonomiaz eta segurtasunez mugitzeko eta zerbitzu publikoetara iristeko», azaldu du Garcíak.
Pasabide goratu berria Erregezaintza kalean
Bigarren esku-hartzea Erregezaintza kaleko 47. zenbakiaren inguruan, Antiguan, egin da. Oinezkoen pasabidearen inguruan desnibel handia zegoen zintarriaren eta arekaren artean. Gainera, hainbat irregulartasun zeuden eta ez zegoen arauzko baldosa podotaktilik.
Hiri Mantentze eta Zerbitzuek oinezkoentzako pasabide goratu bat egin dute, irisgarritasuna hobetzeko eta ibilgailuak abiadura murriztera behartzeko. Bestalde, plazatik gertuen dagoen espaloia zabaldu da, espaloi-belarri bat sortuz. Horrela, gidarien eta oinezkoen arteko ikusgaitasuna hobetu eta gurutzebidearen segurtasuna areagotu da. Esku-hartzeak 20.434 euroko aurrekontua izan du.
«Erregezaintza kalean irisgarritasun-zailtasun handiak zituen puntu bat konpondu dugu; gainera, haur-parke baten eta hartutako kalte zerebrala duten pertsonen elkarte baten ondoan dago. Konfigurazio berriak ikuspena hobetzen du, ibilgailuak abiadura murriztera behartzen ditu eta gurutzatzea askoz seguruagoa da orain», adierazi du Garcíak.
Deja un comentario