Donostiako Udalak eta hiriko euskaltegi eta zentro homologatuek euskara ikasteko deia egin diete herritarrei. 2026-2027 ikasturtean euskara ikasi nahi dutenek irailaren 1etik aurrera eman ahal izango dute izena, eta aurten ere #euskaldunízate leloa izango du matrikulazioa sustatzeko kanpainak.
Kerman Orbegozo Pertsonak, Ekonomia eta Aurrekontu Kudeaketa eta Euskarako zinegotzi ordezkariaren esanetan, leloak «euskalduntzeko modu ugari» adierazten ditu. Kanpainaren protagonistak gaur egun euskara ikasten ari diren hainbat pertsona izango dira, tartean Aniol Ekai, Munduko CrossFit Txapelketan laugarren izandakoa.
Euskaltegi eta zentro homologatuek eskaintza zabala izango dute, ohiko ikastaroetatik hasi eta ikastaro intentsibo eta autoikaskuntzakoetaraino. Horrez gain, merkatari eta ostalarientzako, gurasoentzako, erretiratuentzako, etorkinentzako eta gazteentzako ikastaro bereziak ere eskainiko dira.
Donostiako Udalak 440.000 euro bideratuko ditu euskara ikasteko dirulaguntzetara: 305.000 euro ohiko ikastaroetarako eta 135.000 euro xede bereziko ikastaroetarako.
Bestalde, HABEk bono berri bat eskainiko du: 120 euro ordainduta, hainbat urtez euskara ikasteko aukera izango da, hasierako mailaren arabera. Udalak ere maila guztiak diruz laguntzen jarraituko du, baldin eta ikasleak gutxienez azpimaila bat gainditzen badu eta %75eko asistentzia egiaztatzen badu.
2026-2027 ikasturteko udal dirulaguntzak maiatzaren 31ra arte eskatu ahal izango dira. Horretarako, Donostian erroldatuta egon beharko da edo egoitza soziala hirian duen enpresa edo erakunde batean lan egin.
Deja un comentario