Mantala Basque Gastronomyk, BSTK Basotik Fundazioarekin elkarlanean, Gastro Gaztea topaketa egin du astelehen honetan Pagoetako Parke Naturalean. Gastronomiari, ekoizpenari, artisautzari eta lurraldeari lotutako profesional gazteak bildu dira gastronomia berdeago eta jasangarriago baten inguruan hausnartzeko.
Jardunaldiak basoa izan du ardatz, biodibertsitatea, ezagutza, lehengaiak eta kultura gastronomikoa uztartzen dituen espazio gisa. Irekieran Imanol Zubelzuk, Mantala Basque Gastronomyko arduradunak, eta Nora Beltrán de Otálora Errastik, Eusko Jaurlaritzako Elikagaien Kalitate eta Sustapeneko zuzendariak, parte hartu dute, BSTK Basotik Fundazioko ordezkariekin batera.
Goizean zehar, parte-hartzaileek gastronomia berdeari eta jasangarritasunari buruzko lan-dinamiketan parte hartu dute, eta basoarekin, produktuarekin eta ofizioarekin lotutako hainbat proiekturen esperientziak ezagutu dituzte. Horien artean izan dira Miguel Goya (Goya Okelak), Diego Sorrarain, Patricia López de la Calle (Bodegas Artadi), Miriam Loidi eta Agurtzane Subijana.
Topaketak dastaketa gastronomikoarekin amaitu dira. Ama Jatetxeak basoan inspiratutako mokaduak eskaini ditu, Ainhoa Oyangurenen (Trike Koffee Roasters) kafearekin eta Joseba eta Ander Recondoren (Ore Amakoak) ogi eta gozoekin batera.
Gastro Gaztea Mantala Basque Gastronomyk bultzatutako ekimena da, sukaldari, ekoizle, artisau eta sektoreko beste eragile gazteen arteko topaketa, elkarlana eta ezagutza sustatzeko.
Deja un comentario