Irailaren 1ean irekiko da Gipuzkoako Foru Aldundiaren 2026ko egutegia osatuko duen argazki lehiaketan parte hartzeko epea. Herritarren artean oso errotua dagoen ekimen honek irailaren 30era arte jasoko ditu proposamenak, eta 18 urtetik gorako argazkilari zaletu zein profesionalentzat zabalik dago.
Aurtengo gaia “Ekin. Zaindu. Bizi” da, Gipuzkoak ongizatearekin, zaintzarekin eta bizitza osoarekin duen konpromisoa irudikatzeko gonbita.
Lehiaketak 4.000 euro banatuko ditu saritan:
- Argazki irabazleak 1.000 euro jasoko ditu eta egutegiaren azalean argitaratuko da.
- Beste 12 argazki aukeratuk hilabeteko orriak ilustratuko dituzte, bakoitzak 250 euroko saria jasoz.
Parte-hartzaile bakoitzak gehienez hiru argazki aurkeztu ahal izango ditu, originalak eta argitaragabeak, beti ere Gipuzkoan ateratakoak. Oinarrizko edizio digitala onartuko da, baina ez da onartuko irudiak manipulatzea, elementuak gehitzea edo ezabatzea, ezta adimen artifiziala erabiltzea ere.
Argazkiak www.gipuzkoa.eus/eu/argazki-lehiaketa webgunean igo beharko dira. Epaimahaia Aldundiko eta Gipuzkoako Argazkilari Elkarteko ordezkariek osatuko dute, eta 13 argazki onenak aukeratuko dituzte kalitate artistikoa, teknika eta lehiaketaren gaiarekin duten lotura baloratuz.
Egutegia urteko argitalpen enblematiko bilakatu da: azken edizioan 644 argazki aurkeztu ziren eta 40.000 ale banatu ziren lurralde osoan.
Deja un comentario