Gipuzkoako hamar udalerritako ondare erlijiosoa zaharberrituko dute 2026an

Donostiako Elizbarrutiak Gipuzkoako ondare erlijiosoa zaharberritzeko eta kontserbatzeko hainbat esku-hartze egingo ditu 2026an, Gipuzkoako Foru Aldundiko Kultura, Lankidetza, Gazteria eta Kirol Departamentuaren laguntzarekin.

Jarduketak lurraldeko hainbat eskualdetan banatutako hamar ondasunetan egingo dira. Lanak nagusiki estalkiak, eliz atariak eta denboraren joanak eragindako beste elementu arkitektoniko batzuk birgaitzera eta saneatzera bideratuko dira.

Goizane Álvarez Kultura, Lankidetza, Gazteria eta Kiroletako diputatuak adierazi duenez, «ondare erlijiosoa gure herrien memoriaren, historiaren eta paisaiaren parte da». Haren hitzetan, ondare hori kontserbatzeak «ez du esan nahi soilik eraikinak babestea, baizik eta gure komunitateak nola eraiki diren azaltzen duten testigantzak gordetzea eta hurrengo belaunaldiek ezagutzen eta gozatzen jarraitu ahal izatea bermatzea».

Álvarezek programaren lurralde-izaera ere nabarmendu du. «Jarduketa horiek eskualde desberdinetako udalerrietara iristen dira, eta ondarea dagoen tokian zaindu behar duen kultura-politika bati erantzuten diote, herri bakoitzaren tamaina edo biztanleria edozein dela ere», azaldu du.

Hamar jarduketa lurralde osoan

Aurreikusitako esku-hartzeen artean daude Zeraingo Andre Mariaren Jasokundearen elizako estalkiak, Andoaingo Gurutze Deunaren ermita eta Segurako Andre Mariaren Jasokundearen eliza birgaitzea.

Altzo-Azpiko San Salvador elizan ere egingo dira lanak. Eraikinak garrantzi historiko berezia du, Gipuzkoa izenaren ezagutzen den lehen aipamen idatzietako bat gordetzen baitu, 1025. urtekoa.

Era berean, Aiako San Esteban eliza garbituko da; Bergarako Santa Marina eta Oikiako San Bartolome elizetako atariak saneatuko dira; eta Azpeitiko Soreasuko San Sebastian elizako kanpandorrea sendotuko da.

Horrez gain, Getariako San Salvador elizako estalkiak saneatuko dira eta Askizuko San Prudentzio ermita birgaituko da. Azken horrek XII. mendeko aztarna arkeologikoak gordetzen ditu.

Kultura-ondasunen babesa

Jarduketen helburua kultura-ondasun deklaratutako eta Gipuzkoako tradizio arkitektoniko, historiko eta sozialari estuki lotutako eraikinen kontserbazioa bermatzea da.

Esku-hartzeen bidez higiezinen narriadura geldiarazi, egonkortasuna hobetu eta balio bereziko eraikuntza- eta arkeologia-elementuak babestu nahi dira. Estalkiak eta eliz atariak birgaitzeak, gainera, iragazketak eta kalteak saihestea du helburu, egiturak eta barruan dauden ondasunak babesteko.