Grigory Sokolov pianista Kursaal Auditoriumera itzuliko da ostegun honetan, abuztuaren 13an, 20:00etan, Musika Hamabostaldiaren barruan. Egungo pianista mirestuenetako batek Beethovenen eta Schuberten obrez osatutako errezitaldia eskainiko du, klasizismoaren eta lehen erromantizismoaren arteko trantsizioan oinarrituta.
Kontzertuaren lehen zatian, Sokolovek Beethovenen 4. Sonata mi bemol maiorrean, op. 7 eta Sei bagatelak, op. 126 interpretatuko ditu. Bigarren zatia, berriz, Schuberten 21. Sonata si bemol maiorrean obrari eskainiko dio oso-osorik.
Grigory Sokolov (Leningrado, 1950) 1966an Moskuko Tchaikovsky Lehiaketa irabazi zuen, eta lehiaketaren historiako irabazlerik gazteena izaten jarraitzen du. Europako kontzertu-areto eta jaialdi ospetsuenetako ohiko gonbidatua da eta, besteak beste, New Yorkeko Orkestra Filarmonikoarekin, Municheko Orkestra Filarmonikoarekin, Leipzigeko Gewandhausekin, Londresko Philharmoniarekin eta Amsterdamgo Concertgebouwekin aritu da.
Pianistak lotura luzea du Donostiarekin eta Musika Hamabostaldiarekin. Laurogeita hamarreko hamarkadan aritu zen lehen aldiz Donostian, eta Hamabostaldian 2005, 2007, 2011, 2015, 2021 eta 2023ko edizioetan parte hartu du. Azken bi errezitaldietan Chopin eta Rachmaninoven obrak interpretatu zituen, 2021ean, eta Purcell eta Mozartenak, 2023an.
Oraingoan Beethoven eta Schubert aukeratu ditu. Bi konpositoreak sarritan agertzen dira elkarrekin Sokoloven programetan, eta 2020an disko bat eskaini zien Deutsche Grammophon zigiluan.
Sarrerak quincenamusical.eus webgunean eta Kursaaleko eta Victoria Eugenia Antzokiko leihatiletan eros daitezke.
Deja un comentario