Gipuzkoako Foru Aldundiko Kultura eta Kirol Departamentuak hiru entrenamendu-saio bultzatuko ditu Getaria-Zarautz Itsas Zeharkaldian eta Zarautz-Mollarri-Zarautz proban izena eman duten emakumeentzat. Ekimena Emakumeok Mugimenduan/Mujeres y Activas programaren barruan kokatzen da, eta Zarautz Balea Igeriketa Taldearekin eta Arazi Ideiak Borobiltzen enpresarekin elkarlanean egingo da.
Prestaketa-saioak maiatzaren 31n, ekainaren 21ean eta uztailaren 11n izango dira, Getariako hondartzan. Helburua da emakumeen parte-hartzea erraztea, uretan duten konfiantza indartzea eta esperientzia segurtasun handiagoz bizitzen lagunduko dien aldez aurreko laguntza eskaintzea.
Saioak Getaria-Zarautz Itsas Zeharkaldiko eta Zarautz-Mollarri-Zarautz probako parte-hartzaileei zuzenduta egongo dira. Bereziki ur irekietako proba mota horiei lehen aldiz aurre egingo dieten emakumeentzat pentsatuta daude, eta izena emateko prozesuan lehentasuna izango dute lehen aldiz parte hartuko dutenek.
Getaria-Zarautz Itsas Zeharkaldiak 54. edizioa ospatuko du uztailaren 18ko eta 19ko asteburuan. Aurten 3.300 parte-hartzaile izango ditu, eta izen-emateak maiatzaren 4an itxi ziren, inoiz baino lehenago. Zarautz-Mollarri-Zarautz probarako izen-emateek zabalik jarraitzen dute.
Aldundiaren arabera, emakumeen parte-hartzeak gora egin du azken urteetan: 2019an 750 emakumek hartu zuten parte; 2022an, 808k; 2023an, 922k; 2024an, 1.090ek; eta 2025ean 1.100 emakumera iritsi zen kopurua, parte-hartzaileen guztizkoaren %35era.
Goizane Álvarez Kultura eta Kiroletako diputatuak nabarmendu du datu horiek “erakusten dutela konfiantza, laguntza eta segurtasun baldintzak sortzen direnean emakume gehiagok ematen dutela pausoa”. Haren esanetan, “ez da nahikoa kirolerako atea irekitzea; baldintzak sortu behar dira emakume guztiek ate hori berdintasunean zeharkatu ahal izan dezaten”.
Aurrez aurreko saioez gain, Zarautz Balea Igeriketa Taldeak hamar asteko entrenamendu-plan espezifikoa diseinatu du emakumeentzat. Planak igerilekuko eta itsasoko saioak uztartzen ditu, proba modu progresiboan prestatzeko.
Deja un comentario