Insaustik Donostiako ezagutza eta Gipuzkoako industria lotzearen alde egin du

Jon Insausti Donostiako alkateak Tecnaliaren instalazioak bisitatu ditu gaur, zentroak garatzen dituen proiektu eta ikerketa-ildo batzuk bertatik bertara ezagutzeko. Bisita ikasturte politiko berriaren hasieran enpresekin egingo duen bilera-sortaren parte da, haien beharrak entzuteko eta Donostian jarduera ekonomikoa, berrikuntza eta enplegua sortzen laguntzen ari diren proiektuak ezagutzeko.

Insaustik adierazi du ehun ekonomikoarekiko hurbiltasuna izango dela ikasturte berriaren lehentasunetako bat. «Gure enpresetatik gertu egon nahi dut, ekiten dutenengandik, ikertzen dutenengandik eta, batez ere, egunero lan egiten duten eta hiriko ekonomiak aurrera egitea eragiten duten milaka pertsonengandik gertu. Donostia indartsu eta etorkizuneko batek enpresa indartsuak, enplegu onak eta aurrera egiteko aukerak behar ditu», adierazi du.

Tecnalia ikerketa aplikatuko eta garapen teknologikoko zentroa da, Basque Research and Technology Alliance erakundeko kidea, eta 1.500 pertsona baino gehiagoko taldea du.

Ezagutza eta enpresak konektatzea

Bisitan, alkateak nabarmendu du Donostiako aktiboetako bat unibertsitateen, teknologia- eta ikerketa-zentroen, enpresa berritzaileen, startupen eta kualifikazio handiko profesionalen kontzentrazioa dela. Haren ustez, datozen urteetako erronketako bat ezagutza hori enpresekin eta ekonomiarekin gehiago lotzea izango da.

«Donostiak ezagutza handia sortzen du. Baina ezagutzak balio osoa hartzen du aplikatzeko gai garenean: enpresa batera iristen denean, prozesu bat hobetzen duenean, produktu bat sortzen duenean, lehiakortasuna handitzen duenean edo lanpostu berri bat sortzen duenean. Donostiak sortzen duen ezagutza gure enpresen eta industriaren zerbitzura jarri nahi dugu», azaldu du Insaustik.

Alkateak Donostiak Gipuzkoako industriarekiko izan dezakeen zeregina ere azpimarratu du. «Gipuzkoak industria indartsua du, eta Donostiak ezagutza kontzentrazio aparta du. Bi gaitasun horiek konektatzea da aurrean dugun aukera handienetako bat», esan du.

«Zifra ekonomikoen atzean pertsonak daude»

Insaustik erakundeek ekonomiatik gertu egon behar dutela defendatu du, eta eguneroko lanarekin jarduera ekonomikoari eusten dioten pertsonen garrantzia nabarmendu du. «Hiri batek ez du aurrera egiten bere erakundeen erabakiengatik bakarrik. Aurrera egiten du egunero lan egiten, ekiten, ikertzen, arriskatzen eta beren proiektuak eta familiak aurrera ateratzen dituzten milaka pertsonari esker», adierazi du.

Alkateak gaineratu du zifra ekonomikoen atzean «pertsonak eta bizi-proiektuak» daudela, eta ikuspegi hori bizi-kalitatea eta gizarte-kohesioa ekonomia berritzaile, produktibo eta lehiakorrarekin uztartzeko planteatzen duen hiri-ereduarekin lotu du.