Mikel Lertxundi artistak «Natura, Harmonia, Poesia» izeneko erakusketa zabalduko du ostegun honetan Okendo Kultur Etxeko erakusketa areto berrian. Ekainaren 26tik abuztuaren 29ra bitartean, eskulturak, margolanak, marrazkiak eta argazkiak bilduko dituen diziplina anitzeko erakusketa izango da ikusgai.
Berriatuko artistak 50 urte baino gehiagoko ibilbidea egin du artearen alorrean, eta bere lanetan harria, egurra eta burdina dira protagonista nagusiak. Material horiek elkarren arteko harremanean agertzen dira, oreka, harmonia eta poesiaren ideiak azaleratuz.
Erakusketa hau Donostian antolatutako egitasmo zabalago baten parte da. Izan ere, «Natura, Harmonia, Poesia» izenburupean hiru erakusketa antolatu ditu Lertxundik formatu desberdinetan. Formatu txikiko piezak Ekain Arte Lanak galerian ikus daitezke uztailaren 4ra arte; neurri handiko lau eskultura, berriz, San Bizente elizaren atarian daude ikusgai abuztuaren 23ra arte.
Okendo Kultur Etxeko erakusketak formatu ertaineko lanak bilduko ditu. Guztira 26 artelan izango dira ikusgai, horien artean eskulturak, bideo-eskultura bat, margolanak, marrazkiak eta argazkiak. Artistaren sormen prozesua azaltzen duen ikus-entzunezko bat ere eskainiko da.
Lertxundik 1974an egin zuen bere lehen erakusketa, eta ordutik Euskal Herrian nahiz nazioartean erakutsi du bere lana. Bere obrak, besteak beste, Bilboko Arte Ederren Museoan, San Telmo Museoan eta Kutxa Bilduman daude.
Deja un comentario