SUHAR Korua Asiara doa: Taiwanen kartelburu izango da eta Filipinetan kontzertu bateratua eskainiko du

SUHAR Korua, Esteban Urzelaik zuzentzen duen Euskal Herriko ahots grabeen abesbatza, Taiwan eta Filipinetara eramango duen nazioarteko bira berri bati ekiteko prestatzen ari da. Taldearen orain arteko nazioarteko proiekziorik handieneko bira izango da, azken urteotan Txinan, Bulgarian eta Lituanian parte hartu ondoren.

Esteban Urzelai zuzendariaren hitzetan, «Taiwanen eta Filipinetan egingo dugun bira hau beste urrats bat da abesbatzaren nazioarteko proiekzioan eta euskal kultura eta hizkuntza mundu mailako erreferentziazko agertokietan zabaltzeko bidean».

Kartelburu Taiwanen

SUHAR Koruak uztailaren 24tik abuztuaren 2ra egingo den Taipei International Choral Festival (TICF) jaialdian parte hartuko du. Taipei Philharmonic Foundation-ek antolatutako jaialdia Asiako abesbatzen topagunerik garrantzitsuenetako bat da.

Euskal abesbatza jaialdiko kartelburua izango da, Cantemus, Megaron eta Kammer abesbatzekin batera, eta bost kontzertu eskainiko ditu. Emanaldirik nabarmenena uztailaren 30ean izango da, Taipeiko Kontzertu Areto Nazionalean.

Kontzertua Manilan

Taiwaneko egonaldiaren ondoren, SUHAR Koruak Filipinetara bidaiatuko du. Abuztuaren 2an «Izar ederrak» (Beautiful Stars) kontzertua eskainiko du Male Ensemble Philippines taldearekin batera, Manilako Intramuros auzoko Turismo Zentroan.

Kontzertua Philippine Madrigal Singersek antolatu du, ANIMADZen bidez, Intramuros Administration-ekin lankidetzan, eta bi kontinente desberdinetako gizonezkoen bi abesbatzak lehen aldiz arituko dira elkarrekin agertoki berean.

Euskal musika eta nazioarteko errepertorioa

Asiako birarako prestatu duten programak tradizioa eta gaur egungo musika uztartzen ditu. Hildegard von Bingen, Franz Schubert eta Jaakko Mäntyjärviren lanak interpretatuko dituzte, baita Francisco Madina, Eduardo Mocoroa, Iker González, Eva Ugalde eta Jukcal Guerrero euskal konpositoreen lanak ere. Errepertorioak euskarari eta euskal musikari protagonismo berezia emango die.

2018an sortu zen SUHAR Korua, eta ordutik nazioarteko hainbat aitortza jaso ditu. Besteak beste, 2023ko Tolosako Nazioarteko Abesbatzen Lehiaketako Sari Nagusia irabazi zuen, eta azken urteotan Txinan, Bulgarian eta Lituanian ere parte hartu du.