Urgulleko Natur Txokoa, Liburutegia eta Historiaren Etxea dagoeneko zabalik daude, eta abuztuaren 31ra arte aisialdia, natura eta kultura uztartzen dituen udako programa eskainiko dute. Eskaintza haurrei eta familiei nahiz publiko orokorrari zuzenduta dago.
Astelehenetan jarduerak egingo dira Liburutegian, eta astearte eta asteazkenetan Natur Txokoan. Jarduera guztiak doakoak izango dira eta euskaraz eskainiko dira.
Aurtengo berrikuntza nagusiak Historiaren Etxean izango dira. Alde batetik, Donostiaren oroigarri. Galarza Argazki Funtsa erakusketaren egokitzapena izango da ikusgai. Argazki horien bidez, bisitariek XX. mendearen lehen erdiko Donostiaren bilakaera urbanistikoa eta soziala ezagutzeko aukera izango dute. Bestetik, Donostia 1813 aurretik ikus-entzunezkoa proiektatuko da. Modelizazio digitalaren bidez, desagertutako Donostia berreskuratzen du ikus-entzunezkoak, 1813ko suntsiketaren aurreko hiria erakutsiz.
Historiaren Etxea Mota gazteluan dago, eta abuztuaren 31ra arte egongo da zabalik, astearteetan izan ezik, 11:00etatik 19:00etara. Sarrera doakoa izango da.
Natur Txokoa Gobernadorearen baterian dago, eta egunero irekiko da 11:00etatik 14:00etara eta 16:00etatik 19:00etara. Astearte eta asteazken arratsaldetan haurrentzako jarduera bereziak egingo dira, eta gainerako egunetan Artisten Txokoa egongo da zabalik, eskulanetarako materialarekin.
Liburutegia, berriz, Damen baterian dago, eta egunero egongo da zabalik 11:30etik 13:30era eta 17:00etatik 20:00etara. Irakurketaz gain, astelehen arratsaldetan haurrentzako jarduerak antolatu dituzte. Uztailaren 6an Zu zara magoa ikuskizuna izango da Edu Magoaren eskutik, eta uztailaren 13tik aurrera, astelehen guztietan, Urgullen kontu-kontari saioak egingo dira Lur Korta Taldearekin.
Deja un comentario