Donostia Zinemaldiaren 74. edizioak José Giovanni zinemagile, gidoigile eta eleberrigile frantziarrari eskainitako atzerabegirakoa aurkeztuko du. Zikloak 1960 eta 2001 artean estreinatutako 20 film luze bilduko ditu.
Giovanni Frantziako polizia-zinemaren garai nagusiko izen esanguratsuenetako bat izan zen. Atzerabegirakoak hark zuzendutako ia film guztiak berreskuratuko ditu, baita beste zinemagile batzuentzat idatzitako zortzi film ere. Horien artean daude Jacques Becker, Jean-Pierre Melville, Jacques Deray, Claude Sautet, Henri Verneuil eta Robert Enrico zuzendarien lanak.
Zikloa Donostia Zinemaldiak eta Euskadiko Filmategiak antolatu dute, Espainiako Zinematekaren lankidetzarekin. Egitasmoaren barruan, gainera, José Giovanni. No hay vida plena sin piedad liburua argitaratuko da. Felipe Cabrerizok idatzi du lana, eta Quim Casas zinema-kritikari eta Donostia Zinemaldiko Hautespen Batzordeko kideak editatu du.
Azterlanak Giovannik eleberrigile, gidoigile eta zuzendari gisa sortutako obra osoa berrikusten du, baita haren bizitzako zenbait alderdi polemiko ere, besteak beste alemaniarren okupazioan izan zuen eginkizuna eta kartzelatik ihes egiten saiatu zenekoa.
Liburua gaztelaniaz eta ingelesez argitaratu da, eta Zinemaldiak eta Euskadiko Filmategiak bultzatutako bildumako bosgarren alea da. Aurreko lanak Claude Sauteti, Hiroshi Teshigaharari, Italiako polizia-zinemari eta Lillian Hellman gidoigileari eskaini zitzaizkien.