Donostia Zinemaldiak Tanta Saria sortu du larrialdi klimatikoa hainbat ikuspegitatik lantzen duten ikus-entzunezko proiektuak babesteko. 5.000 euroko sari berria aurtengo edizioan Ikusmira Berriak sailean eta Europa–Latinoamerika Koprodukzio Foroan hautatutako proiektuen artean banatuko da.
Zinemaldiak azaldu duenez, ekimenaren helburua da sorkuntzaren hasierako faseetan ingurumenari lotutako ikuspegiak sustatzea eta klima-larrialdiari buruzko kontakizun eraikitzaile eta eraldatzaileak bultzatzea.
Saria European Climate Foundation erakundearekin garatutako lankidetzaren barruan sortu da. Gainera, Zinemaldiak Greenpeace eta Climate Spring erakundeekin ere egiten du lan klima-aldaketari buruzko narratibak sustatzeko.
Bestalde, Zinemaldiak gogorarazi du hasieratik parte hartzen duela Naturklimak sustatutako Borondatezko Karbono Funtsaren bidez. Tresna horren bitartez, emisioak konpentsatzeaz gain, Gipuzkoan basoak lehengoratzeko, biodibertsitatea indartzeko eta klima-aldaketara egokitzeko proiektuak babesten dira.
Horren adibide da Tolosako Uzturre mendiko Miserikordia Zaharra inguruan egindako esku-hartzea. 2025ean garatutako proiektu horretan espezie inbaditzaileak kendu eta 1.075 zuhaitz autoktono landatu ziren, klima-babesleku irisgarri bat sortzeko helburuarekin.
Deja un comentario